ទីតាំង: ភូមិចំបក់ហែ ឃុំកំពង់ថ្កូវ ស្រុកក្រឡាញ់ ខេត្តសៀមរាប
ខ្លឹមសារសង្ខេប: បន្ទាប់ពីបានចូលរួមជាមួយគម្រោងបំរែបំរួលអាកាសធាតុរបស់បន្ទាយស្រី យៀប ធារី បានប្រើបច្ចេកទេសដែលនាងបានរៀនជាមួយផលិតកម្មដំណាំផ្ទាល់ខ្លួន ដូច្នេះហើយបានធ្វើឱ្យប្រាក់ចំណូល និងទំនាក់ទំនងគ្រួសាររបស់នាងកាន់តែប្រសើរឡើងយ៉ាងខ្លាំង។
លោកស្រី យឿប ធារី អាយុ៤២ឆ្នាំ រស់នៅភូមិចំបក់ហែ ឃុំកំពង់ថ្កូវ ស្រុកក្រឡាញ់ មានប្តី កូនស្រី និងកូនប្រុស។ លោកស្រី ធារី ជាកសិករ ហើយធ្វើការជាមួយដំណាំ និងបសុសត្វ។
ជាអកុសល ប្រវត្តិគ្រួសាររបស់លោកស្រី ធារី មានភាពអាប់អួរដោយសារការរំលោភបំពាន ដោយសារប្តីរបស់នាងតែងតែមានកំហឹង និងប្រើអំពើហិង្សាលើរូបលោកស្រី និងកូនៗជាញឹកញាប់។
យ៉ាងណាក៏ដោយនៅឆ្នាំ ២០១១ លោកស្រីធារី បានចូលរួមជាមួយនឹងគម្រោងបម្រែបម្រួលអាកាសធាតុបន្ទាយស្រី។ គម្រោងសាកល្បងនេះត្រូវបានណែនាំដល់កសិករមួយក្រុមចំនួន ២០ នាក់ ដែលត្រូវបានបង្រៀនពីបច្ចេកទេសកសិកម្មថ្មីដែលធន់នឹងគ្រោះរាំងស្ងួតដែលតែងតែកើតឡើងនៅក្នុងខេត្ត។ អ្នកចូលរួមដាំពោត សណ្ដែក ផ្លែឪឡឹក ត្រសក់ រួមជាមួយនឹងការទទួលការបណ្តុះបណ្តាល ដែលភ្ជាប់ទ្រឹស្តីជាមួយការអនុវត្ត។ ពួកគេក៏ទទួលបានការបណ្តុះបណ្តាលស្តីពីការធ្វើជីកំប៉ុស ការបង្កើត និងប្រើប្រាស់ប្រព័ន្ធធារាសាស្រ្តស្រក់ និងទម្លាក់ ការផលិតថ្នាំសម្លាប់សត្វល្អិតធម្មជាតិ ព្រមទាំងសិក្សាព័ត៌មានសំខាន់ៗអំពីវដ្តទឹក។
បន្ទាប់ពីរៀនជាមួយគ្នានៅកសិដ្ឋានបង្ហាញ លោកស្រីធារីបានចាប់ផ្តើមអនុវត្តបច្ចេកទេសដាំដំណាំទាំងនេះទៅក្នុងដីទំហំ ៣០០ ម៉ែត្រការ៉េផ្ទាល់ខ្លួនរបស់លោកស្រី ដោយមានការគាំទ្រពីអង្គការបន្ទាយស្រី ដែលរួមមានការផ្តល់ប្រព័ន្ធធារាសាស្ត្រស្រក់ទឹក និងសំណាប ដើម្បីចាប់ផ្តើមគម្រោងថ្មីរបស់នាង។ ជាផ្នែកមួយនៃគម្រោងរបស់អង្គការបន្ទាយស្រី កសិករជាច្រើននាក់ក៏ត្រូវបានលើកទឹកចិត្តឱ្យទៅមើលចម្ការផ្សិតក្នុងខេត្តព្រៃវែងផងដែរ។ បន្ទាប់ពីវិលត្រឡប់មកពីទស្សនកិច្ចវិញ ក្នុងគោលបំណងបង្រៀន និងលើកទឹកចិត្តដល់ការដាំដុះបន្ថែមទៀត លោកស្រីធារីត្រូវបានបំផុសគំនិតឱ្យបណ្ដុះផ្សិតចំបើងដោយខ្លួនឯង ហើយបានពិភាក្សាអំពីជម្រើសនេះជាមួយស្វាមីលោកស្រី។ ទីបំផុតគ្រួសារនេះបានសម្រេចចិត្តពង្រីកផលិតកម្មដំណាំរបស់ខ្លួន ហើយលោកស្រីធារី ឥឡូវនេះអាចទទួលបានប្រាក់ចំណូលប្រចាំថ្ងៃចន្លោះពី ៤០០០០ រៀល ទៅ ៥០០០០ រៀល តាមរយៈការលក់ដំណាំផ្សិតរបស់លោកស្រី។ បន្ទាប់ពីមើលឃើញលទ្ធផលវិជ្ជមាននេះ លោកស្រីធារីក៏សម្រេចចិត្តបន្តពង្រីកការដាំដុះរបស់លោកស្រី និងថែមទាំងពិសោធន៍បច្ចេកទេសដាំដំណាំផ្សេងៗ ដោយផ្អែកលើចំណេះដឹងដែលលោកស្រីបានរៀននៅក្នុងកម្មវិធីរបស់អង្គការបន្ទាយស្រី។
លោកស្រីធារីបានពន្យល់ពីរបៀបដែលគម្រោងបំរែបំរួលអាកាសធាតុក៏មានឥទ្ធិពលវិជ្ជមានទៅលើទំនាក់ទំនងផ្ទាល់ខ្លួនរបស់លោកស្រី ដោយលោកស្រីបានពន្យល់ថា ស្វាមីរបស់លោកស្រីបានចូលរួមចំណែកជាវិជ្ជមានក្នុងអាជីវកម្ម ដោយបានជួយការងារធ្ងន់ៗដែលពាក់ព័ន្ធនឹងការដំណើរការរបស់ចម្ការ។ ដោយសាររកបានប្រាក់ចំណូលបន្ថែម និងមិនសូវមានសម្ពាធលើគ្រួសារ ពួកគេក៏លែងជំពាក់បំណុលគេ ពួកគេមានសន្តិសុខក្នុងការប្រកបរបរបន្ត ហើយពួកគេអាចផ្តល់អាហារូបត្ថម្ភដល់គ្រួសារ ក៏ដូចជាបញ្ជូនកូនទៅសាលារៀនផងដែរ។ សុខភាពទូទៅរបស់ក្រុមគ្រួសារមានភាពប្រសើរឡើង ដោយសារពួកគេទទួលបានបន្លែស្រស់ៗ និងគ្មានជាតិគីមី។ លោកស្រីធារី បាននិយាយថា ប្តីរបស់លោកស្រីលែងប្រើហឹង្សាលើរូបលោកស្រី និងកូនៗទៀតហើយ ព្រោះនេះជាអាជីវកម្មជោគជ័យ ដែលធ្វើឱ្យគ្រួសារលោកស្រីកាន់តែមានសុភមង្គល។
ផែនការរបស់លោកស្រីធារី សម្រាប់ថ្ងៃអនាគត គឺលោកស្រីនឹងចែករំលែកចំណេះដឹង និងបទពិសោធន៍របស់លោកស្រីជាមួយសមាជិកសហគមន៍ផ្សេងទៀត ក៏ដូចជាការបន្តពង្រីកអាជីវកម្មរបស់លោកស្រីលើការដាំដុះផ្សិត បន្លែ និងចិញ្ចឹមមាន់។ លោកស្រីមានការប្តេជ្ញាចិត្តយ៉ាងមុតមាំក្នុងការគាំទ្រកូនៗរបស់លោកស្រីក្នុងការទទួលបានការអប់រំ ដោយសង្ឃឹមថាពួកគេអាចទៅសិក្សានៅសាកលវិទ្យាល័យជាមួយនឹងប្រាក់ចំណេញដែលលោកស្រីទទួលបាន។
